ການສວຍໃຊ້ປະໂຫຍດທາງເພດຈາກເດັກໃນທາງທຸລະກິດ ໃນ ສປປ ລາວ

ບົດຄົ້ນຄວ້າກ່ຽວກັບກັບການສວຍໃຊ້ປະໂຫຍດທາງເພດຈາກເດັກນ້ອຍໃນທາງທຸລະກິດ (CSEC) ໃນ ສປປ ລາວສະບັບນີ້ ແມ່ນສ້າງຂຶ້ນພາຍໃຕ້ການຮ່ວມມືລະຫວ່າງ ກະຊວງແຮງງານ ແລະ ສະຫວັດດີການສັງຄົມ, ອົງການຢູນິເຊັບ ປະຈຳລາວ, ອົງການ UNIAP, ອົງການຊ່ວຍເຫຼືອເດັກ ແລະ ອົງການສຸພະນິມິດ, ເພື່ອຈຸດປະສົງໃນການສົ່ງເສີມຄວາມເຂົ້າໃຈ ເພື່ອໃຫ້ຂໍ້ມູນ ແລະ ໃຫ້ທິດທາງສຳລັບການດຳເນີນງານແຫ່ງຊາດກ່ຽວກັບບັນຫາດັ່ງກ່າວ. ໃນຂະນະທີ່ CSEC ຖືເປັນໜຶ່ງໃນບັນຫາການປົກປ້ອງເດັກນ້ອຍໃນ ສປປ ລາວ, ຂໍ້ມູນທາງດ້ານຄຸນະພາບ ແລະ ປະລິມານ ກໍຄືຫຼັກຖານທີ່ມີກ່ຽວກັບສະຖານະໃນປະຈຸບັນ ຫຼື ສິ່ງສໍ່ສະແດງ, ຂະໜາດ ແລະ ຂອບເຂດຂອງປະກົດການດັ່ງກ່າວ ແມ່ນມີໜ້ອຍ. ການປ່ຽນແປງທາງດ້ານເສດຖະກິດ ແລະ ສັງຄົມໃນໄລຍະຜ່ານມາ ໄດ້ສົ່ງຜົນຕໍ່ການປ່ຽນແປງຂອງ CSEC ໃນ ສປປ ລາວ,ໂດຍສະເພາະໃນດ້ານຮູບແບບ ເຊັ່ນຮູບພາບອານາຈານເດັກ ແລະ ການທ່ອງທ່ຽວບໍລິການ ທາງເພດເດັກ ເຊິ່ງເກີດຂຶ້ນນັບແຕ່ການເຮັດບົດຄົ້ນຄວ້າກ່ຽວກັບບັນຫາດັ່ງກ່າວເປັນຄັງທຳອິດໃນປີ 2002. ຍ້ອນການສວຍໂອກາດທາງເພດເດັກເພື່ອທຸລະກິດ ມີລັກສະນະ ຜິດກົດໝາຍ ແລະ ປິດລັບ, ມັນຈຶ່ງເປັນການຍາກທີ່ຈະໄດ້ຂໍ້ມູນທີ່ຊັດເຈນ ກ່ຽວກັບຈຳນວນເດັກນ້ອຍທີ່ຕົກເປັນເຫຍື່ອ. ເພື່ອບັນລຸຈຸດໝາຍດັ່ງກ່າວນີ້ ບົດວິໄຈນີ້ ໄດ້ນຳໃຊ້ຂະບວນການປະສົມປະສານ ລະຫວ່າງວິທີການທາງຄຸນນະພາບ ແລະ ປະລິມານ ເຊັ່ນ ການວິເຄາະຂໍ້ມູນທີ່ມີຢູ່ກ່ຽວກັບ CSEC, ການສຳພາດແບບເຄິງໂຄງສ້າງ ທັງໃນລະດັບນະໂຍບາຍ ແລະ ລະດັບແນວໜ້າທີ່ເຮັດວຽກຕົວຈິງກ່ຽວກັບ CSEC ,ການສັງເກດການໃນພື້ນທີ່ທີ່ມີຄວາມສ່ຽງສູງ, ກໍຄືການຈັດກຸ່ມສົນທະນາ ຮ່ວມກັບຊຸມຊົນ ທີ່ໄດ້ຮັບຜົນກະທົບຈາກ CSEC.