ດັ່ງທີ່ມີການຮັບຮູ້ໃນທົ່ວໂລກ ກໍ່ຄືໃນ ສປປ ລາວ ວ່າ ການໃຊ້ຄວາມຮຸນແຮງຕໍ່ແມ່ຍິງ (VAW) ແມ່ນບັນຫາສາທາລະນະສຸກທີ່ຮ້າຍແຮງ ແລະ ເປັນການລ່ວງລະເມີດສິດທິມະນຸດຕໍ່ແມ່ຍິງ. ແຕ່ວ່າຢູ່ໃນ ສປປ ລາວ, ການໃຊ້ຄວາມຮຸນແຮງຕໍ່ແມ່ຍິງ ເປັນບັນຫາຫຍຸ້ງຍາກທາງວັດທະນະທຳ. ຕາມການສຳຫຼວດຕົວຊີ້ວັດທາສັງຄົມ (LSIS) ປີ 2011-2012, 58% ຂອງແມ່ຍິງ ແລະ 49% ຂອງຜູ້ຊາຍມີລາຍງານວ່າມີການໃຊ້ຄວາມຮຸນແຮງຕໍ່ແມ່ຍິງ ຖ້າວ່າແມ່ຍິງບໍ່ປະຕິບັດຕາມບັນທັດຖານ, ບົດບາດ ແລະ ການພົວພັນທາງເພດຕາມຮີດຄອງປະເພນີ. ເຖິງຢ່າງໃດກໍຕາມ, ຜົນການວິໄຈນີ້ເປັນພຽງສ່ວນນ້ອຍໆ ເພື່ອສະແດງຂະໜາດອັນແທ້ຈິງຂອງບັນຫາ. ເຖິງຈະມີການຄົ້ນຄວ້າຂະໜາດນ້ອຍຫຼາຍຢ່າງ ກ່ຽວກັບການໃຊ້ຄວາມຮຸນແຮງ ຕໍ່ແມ່ຍິງ, ແຕ່ກໍຍັງບໍ່ທັນມີການຄົ້ນຄວ້າລະດັບປະເທດທີ່ລະອຽດ ແລະ ຄອບຄຸມທົ່ວເຖິງ. ພາຍໃຕ້ພື້ນຖານດັ່ງກ່າວນີ້, ການສຳຫຼວດແຫ່ງຊາດກ່ຽວກັບສຸຂະພາບຂອງແມ່ຍິງ ແລະ ປະສົບການຊີວິດ 2014 ຈຶ່ງໄດ້ມີການດຳເນີນ ເພື່ອເກັບກຳຫຼັກຖານທີ່ຈຳເປັນ ໃນການພັດທະນາວິທີການໃນການສ້າງນະໂຍບາຍທີ່ມີປະສິດທິພາບ ເພື່ອຮັບມືກັບບັນຫາດັ່ງກ່າວ. ບົດວິໄຈນີ້ ເຊິ່ງນຳໃຊ້ວິທີການຄົ້ນຄວ້າຫຼາຍປະເທດຂອງອົງການອະນາໄມໂລກ ກ່ຽວກັບສຸຂະພາບຂອງແມ່ຍິງ ແລະ ການໃຊ້ຄວາມຮຸນແຮງພາຍໃນຄົວເຮືອນຕໍ່ແມ່ຍິງ ແມ່ນນຳໂດຍ ຄະນະກຳມະການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ສູນສະຖິຕິແຫ່ງຊາດ ພາຍໃຕ້ການສະໜັບສະໜູນຂອງອົງການ UNFPA ແລະ UN Women.