ເງື່ອນໄຂຕ່າງໆຖືກນຳໃຊ້ ເພືອກຳນົດຄວາມຮູ້ຂອງນັກຫາປາ. ໃນທີ່ນີ້ ພວກເຮົາໃຊ້ຄວາມຮູ້ຂອງນັກຫາປາຕາມສະຖານະການ ເພື່ອອ້າງອີງເຖິງ ຄວາມຮູ້ກ່ຽວກັບການອົບພະຍົບໄລຍະໄກ ຂອງປາ ຈາກນັກຫາປາຊົນເຜົ່າລາວ ທີ່ອາໄສຢູ່ຕາມລ້ອງແມ່ນ້ຳຂອງ ທາງພາກຕາເວັນອອກສຽງເໜືອຂອງໄທ, ທາງພາກໃຕ້ຂອງລາວ ແລະ ພາກຕາເວັນອອກສຽງເໜືອຂອງກຳປູເຈຍ. ພວກເຮົາພິຈາລະນາການເຄື່ອນທີ່ຂອງຄວາມຮູ້, ມະນຸດ ແລະ ປາ, ແລະ ນຳໃຊ້ຂອບໂຄງສ້າງທາງທິດສະດີ ໂດຍອີງໃສ່ ທິດສະດີເຄືອຂ່າຍຜູ້ປະຕິບັດ (ANT) ແລະ ນິເວດວິທະຍາ ທາງການເມືອງ. ຈາກການສຳພາດ, ພວກເຮົາສາມາດສະແດງໃຫ້ເຫັນວ່າ ເປັນຫຍັງການຖ່າຍທອດຄວາມຮູ້ກ່ຽວກັບການອົບພະຍົບຂອງປາຈຶ່ງມີຄວາມສຳຄັນ. ນັກຫາປາມີຫຼາຍວິທີການ ເພື່ອໃຫ້ຮູ້ວ່າ ເວລາໃດທີ່ປາອົບພະຍົບຜ່ານເຂດໃດ, ເຖິງແມ່ນວ່າສິ່ງເຫຼົານີ້ຈະມີການປ່ຽນແປງ ເນື່ອງຈາກຂອບເຂດຊາຍແດນ ແລະ ການປ່ຽນແປງ ທາງເທັກໂນໂລຢີ. ບົດຄົ້ນຄວ້ານີ້ ຕົ້ນຕໍແມ່ນເພື່ອປະກອບສ່ວນ ໃນການຫັນປ່ຽນຈາກການຄົ້ນຄວ້າແບບທຳມະດາກ່ຽວກັບຄວາມສາມາດໃນການເຄື່ອນທີ່ຂອງມະນຸດ ໄປສູ່ການຈະພິຈາລະນາ ຄວາມສຳພັນລະຫວ່າງມະນຸດ, ປາ ແລະ ການເຄື່ອນທີ່ຂອງຄວາມຮູ້, ເຊິ່ງແທດເໝາະກັບທິດສະດີ ANT ໂດຍສະເພາະ, ເນື່ອງຈາກແນໃສ່ການພົວພັນຂອງຫຼາຍສາຍພັນ, ເຊິ່ງເປັນສິ່ງທີ່ນັກຄົ້ນຄ້ວາ ກ່ຽວກັບການເຄື່ອນທີ່ ຈະໄດ້ປະໂຫຍດຈາກເອົາໃຈໃສ່ເພີ່ມເຕີມ ໃນການສັງເກດການ.