ລາວເດີນຕາມປະເທດເພື່ອນບ້ານຄືຈີນ ໃນການສ້າງເຂດເສດຖະກິດພິເສດ (SEZs) ເພື່ອເປັນສ່ວນໜຶ່ງຂອງເຄື່ອງຈັກທາງເສດຖະກິດໃໝ່ ທີ່ອະນຸຍາດໃຫ້ມີນະໂຍບາຍທາງດ້ານ ເສດຖະກິດສະເພາະ ແລະ ມາດຕະການໃນການຄຸ້ມຄອງທີ່ມີຄວາມຢືດຢຸ່ນ ໃນການດຳເນີນທຸລະກິດໃນພື້ນທີ່ໃດໜຶ່ງຂອງປະເທດ. ເຂດ SEZs ໃນລາວດຳເນີນການໃນຖານະຮູບແບບໜຶ່ງ ຂອງເຂດພິເສດທີ່ປົກຄອງຕົນເອງ ທີ່ສ້າງຂຶ້ນສຳລັບນັກລົງທຶນຕ່າງປະເທດ ໂດຍສະເພາະແມ່ນຊາວຈີນ. ພື້ນທີ່ອັນກວ້າງໃຫຍ່ຂອງດິນແດນປະເທດ ໄດ້ຖືກຫັນປ່ຽນໃຫ້ເປັນສະຖານທີ່ ເພື່ອຄວາມບັນເທິງ ແລະ ສູນກາງການທ່ອງທ່ຽວ. ບົດວິໄຈສະບັບນີ້ ນຳໃຊ້ກໍລະນີສຶກສາຂອງເຂດເສດຖະກິດພິເສດສາມຫຼ່ຽມຄຳ ເພື່ອຄົ້ນຄວ້າຄວາມຂັດແຍ່ງເຊິ່ງກັນແລະກັນ ລະຫວ່າງ ຄວາມຕ້ອງການໃນການພັດທະນາ ແລະ ຄວາມຫວັງໃນການຢູ່ລອດ ໃນເຂດຊາຍແດນທາງພາກເໜືອຂອງ ສປປ ລາວ. ມັນໄດ້ທຳການວິເຄາະຄວາມໝາຍ ແລະ ກົນໄກ ທີ່ສ້າງ ຄວາມສະດວກ ໃຫ້ແກ່ຂະບວນວິວັດການພັດທະນາຂອງນັກລົງທຶນຈີນ. ການຫັນປ່ຽນອະທິປະໄຕ ໄດ້ປະກອບສ່ວນເຂົ້າໃນການສ້າງພື້ນທີ່ຍົກເວັ້ນ ທີ່ມີຄວາມຈຳເປັນ ເພື່ອຄວາມເປັນໄປໄດ້ ທາງດ້ານເສດຖະກິດແບບໃໝ່ ເພື່ອຫັນປ່ຽນເຂດທີ່ຍັງຫຼ້າຫຼັງ ແລະ ປະຊາຊົນໃນເຂດດັ່ງກ່າວ ໃຫ້ເປັນຊັບພະຍາກອນໃນການຜະລິດ. ການເຈລະຈາ ແລະ ຄວາມລັງເລຂອງປະຊາຊົນທ້ອງຖິ່ນ ໃນການມີສ່ວນຮ່ວມໃນເຂດເສດຖະກິດໃໝ່ນີ້ ເຮັດໃຫ້ເຂົາເຈົ້າຕົກຢູ່ໃນສະພາບຢຸດຊະງັກ. ບົດວິໄຈນີ້ ຍັງມີການວິເຄາະບົດບາດ ຂອງແຮງງານມຽນມາອົບພະຍົບ ເຊິ່ງເປັນຕົວດຳເນີນການສຳຄັນ, ເປັນຕົວກາງເສລີນົຍົມໃໝ່ ທີ່ຊ່ວຍສ້າງຄວາມເປັນໄປໄດ້ ໃຫ້ແກ່ພາລະກິດການສ້າງຄວາມສີວິໄລຂອງຈີນ.