ແຜນແມ່ບົດໃນການພັດທະນາການປົກຄອງດ້ວຍກົດໝາຍໃນ ສປປ ລາວ ເຖິງປີ 2020

ແຜນແມ່ບົດໃນການພັດທະນາ ສປປ ລາວ ໃຫ້ເປັນປະເທດມີການປົກຄອງດ້ວຍກົດໝາຍ ເຖິງປີ 2020 ນີ້ ປະກອບດ້ວຍສາມພາກທີ່ກ່ຽວຂ້ອງເຊິ່ງເກັນແລະກັນ ຄື: ພາກທີ 1: ການປະເມີນການຄຸ້ມຄອງລັດຖະທະມະນູນ, ກົດໝາຍ ແລະ ເສດຖະກິດ-ສັງຄົມ ຂອງ ສປປ ລາວຈົນເຖິງປະຈຸບັນ ເຊິ່ງກຳນົດຈຸດດີ, ຈຸດອ່ອນ ແລະ ບົດຮຽນທີ່ໄດ້, ການພັດທະນາຊັບພະຍາກອນມະນຸດໃນເມື່ອກ່ອນ ໃນຂະແໜງກົດໝາຍ ແລະ ຍຸດຕິທຳ, ການພັດທະນາຂໍ້ມູນຂ່າວສານກົດໝາຍ ແລະ ການມີສ່ວນຮ່ວມຂອງປະຊາຊົນໃນການພັດທະນາຂະແໜງກົດໝາຍ ແລະ ຍຸດຕິທຳ. ພາກທີ 2: ຈຸດປະສົງ, ມະໂນພາບຄວາມຕ້ອງການ, ທິດຊີ້ນຳ ແລະ ຍຸດທະສາດໃນການພັດທະນາ ສປປ ລາວ ໃຫ້ເປັນປະເທດທີ່ປົກຄອງດ້ວຍກົດໝາຍ ເຖິງປີ 2020. ພາກນີ້ ມີການກຳນົດແຜນຍຸດທະສາດໃນແຕ່ລະດ້ານດັ່ງນີ້: 1) ການພັດທະນາກົດໝາຍຂອງ ສປປ ລາວ; 2) ການພັດທະນາອົງການຈັດຕັ້ງປະຕິບັດກົດໝາຍຂອງ ສປປ ລາວ; 3) ການພັດທະນາຊັບພະຍາກອນມະນຸດໃນຂະແໜງກົດໝາຍ ແລະ ຍຸດຕິທຳ; 4) ການພັດທະນາຂໍ້ມູນຂ່າວສານດ້ານກົດໝາຍ ແລະ ການມີສ່ວນຮ່ວມຂອງປະຊາຊົນໃນຂະແໜງກົດໝາຍ ແລະ ນິຕິກຳ; 5) ການພັດທະນາພື້ນຖານໂຄງລ່າງ ຂອງອົງການຈັດຕັ້ງປະຕິບັດກົດໝາຍຂອງ ສປປ ລາວ. ພາກທີ 3: ວິທີການ ແລະ ມາດຕະການສຳລັບການຈັດຕັ້ງປະຕິບັດແຜນແມ່ບົດສະບັບນີ້. ເພື່ອຮັບປະກັນປະສິດທິພາບໃນການຈັດຕັ້ງປະຕິບັດແຜນແມ່ບົດນີ້, ພາກນີ້ຈຶ່ງມີການກຳນົດກົດໄກໜ້າທີ່ຮັບຜິດຊອບສະເພາະ ສຳລັບການຈັດຕັ້ງປະຕິບັດ, ເຊິ່ງປະກອບດ້ວຍ ຄະນະຊີ້ນຳແຫ່ງຊາດ (NSC), ຄະນະກຳມະການເຮັດວຽກຮ່ວມລະຫວ່າງອົງກອນ (IWC) ແລະ ເລຂາທິການ.