ການລົງທຶນກ່ຽວກັບທີ່ດິນ ກຳລັງຂະຫຍາຍຕົວໃນລາວ, ເຊິ່ງໄດ້ຮັບການຂັບເຂື່ອນ ໂດຍຄວາມຕ້ອງການດ້ານຊັບພະຍາກອນທຳມະຊາດ ໃນບັນດາປະເທດເພື່ອບ້ານທີ່ກຳລັງພັດທະນາ ຢ່າງວ່ອງໄວ. ແຕ່ວ່າລາວ ຍັງຄົງເປັນໜຶ່ງໃນປະເທດທີ່ທຸກຍາກທີ່ສຸດໃນພາກພື້ນອາຊີຕາເວັນອອກສຽງໃຕ້ ເຊິ່ງປະຊາກອນຢ່າງໜ້ອຍ 33 ສ່ວນຮ້ອຍ ດຳລົງຊີວິດຢູ່ພາຍໃຕ້ລາຍຮັບ $1.25 ໂດລາຕໍ່ວັນ (PPP$). ລັດຖະບານລາວຫວັງວ່າ ບັນດາໂຄງການທີ່ເຊື່ອມໂຍງກັບການເຊົ່າ ແລະ ການສຳປະທານທີ່ດິນ ຈະຊ່ວຍສົ່ງເສີມການຜະລິດໃນທ້ອງຖິ່ນ, ຊ່ວຍຍົກລະດັບ ພື້ນຖານໂຄງລ່າງ ແລະ ຊ່ວຍໃນການຫຼຸດຜ່ອນຄວາມທຸກຍາກ. ແຕ່ວ່າ ມັນກໍມີຄວາມສ່ຽງຫຼາຍປະການ ຕໍ່ຊີວິດການເປັນຢູ່ຂອງປະຊາຊົນໃນທ້ອງຖິ່ນ ແລະ ສິ່ງແວດລ້ອມ, ແລະ ການຮັບປະກັນວ່າການລົງທຶນດ້ານທີ່ດິນ ຈະສ້າງປະໂຫຍດແບບຍືນຍົງ ໃຫ້ແກ່ປະຊາຊົນລາວ ຮຽກຮ້ອງໃຫ້ມີການຄຸ້ມຄອງທີ່ມີປະສິດທິພາບ ພາຍໃຕ້ການຕິດຕາມຢ່າງເປັນລະບົບ ແລະ ຂໍ້ມູນທີ່ໂປ່ງໃສ. ບັດຄັດຫຍໍ້ນະໂຍບາຍນີ້ ສະແດງຂໍ້ມູນລາຍລະອຽດທີ່ເລິກເຊິ່ງຈຳນວນໜຶ່ງ ທີ່ມາຈາກການຈົດທະບຽນການສຳປະທານ ແລະ ການເຊົ່າທີ່ດິນແຫ່ງຊາດ, ເຊິ່ງເປັນການເກັບກຳທີ່ລະອຽດທີ່ສຸດ ກ່ຽວກັບສັນຍາທີ່ດິນຂອງປະເທດໃນປະຈຸບັນ.